Захапіўся рыбалкай. У выхадны дзень не супраць пасядзець на беразе рэчкі ці вадаёма. Але ведаю, што хутка пачнецца нераст. Якія абмежаванні чакаюць на гэты час рыбакоў. Міхась, Маладзечна.

На пытанне адказвае начальнік Вілейскай міжраённай інспекцыі аховы жывёльнага і расліннага свету Віктар Івашанка: “Забарона на лоўлю рыбы ўсіх відаў, за выключэннем аматарскага рыбалоўства, уводзіцца з 1 красавіка і будзе доўжыцца да 30 мая. Зроблена ўсё гэта дзеля захавання рыбных рэсурсаў і стварэння спрыяльных умоваў для аднаўлення рыбы.

З першага красавіка вудзіць рыбу можна толькі адной вудай з адным кручком альбо адным спінінгам, аснашчаным штучнай прынадай, з адным адзінарным альбо двайным ці трайным кручком памерам не больш за №10 па міжнароднай класіфікацыі №1.

Вудзіць рыбу дазваляецца толькі ў светлы час сутак (пачынаецца ён за адну гадзіну да ўсходу сонца і заканчваецца праз гадзіну пасля таго, як яно сядзе) з берага.

У час вясновай забароны на лоўлю рыбы інспекцыя аховы жывёльнага і расліннага свету будзе праводзіць рэйдавыя мерапрыемствы па выяўленні парушальнікаў. Усіх аматараў закінуць сетку альбо павудзіць рыбу з лодкі чакаюць штрафы.

Калі ў рыбакоў узнікнуць якія-небудзь пытанні, іх можна задаць па тэлефоне 8(01771) 35226.

Падрыхтавала Марына Сліж

Праглядаў: 109