Раённы выканаўчы камітэт даслаў афіцыйны адказ на запыт “Рэгіянальнай газеты” аб падставах звальнення начальніка аддзела па  фізкультуры, спорце і турызме Віталя Вайды і начальніка аддзела адукацыі Уладзіміра Бадзеева.

Паводле гэтага дакумента, Вілейскі райвыканкам правёў службовую праверку па факце дарожна-транспартнага здарэння з удзелам начальніка аддзела адукацыі Уладзіміра Бадзеева і начальніка аддзела па фізічнай культуры, спорце і турызме Віталя Вайды.

Цытуем дакумент даслоўна: “Устаноўлена, што гэтыя службовыя асобы, знаходзячыся пры выкананні сваіх службовых абавязкаў, дапусцілі дысцыплінарную правіннасць, якая выявілася ва ўжыванні спіртных напояў у рабочы час, што з’яўляецца парушэннем Дырэктывы Прэзідэнта Рэспублікі Беларусь №1 ад 11 сакавіка 2004 года “Аб мерах па ўмацаванні грамадскай бяспекі і дысцыпліны”.

У адпаведнасці з патрабаваннямі аб неадкладным скасаванні кантрактаў з асобамі, што дапусцілі парушэнне Дырэктывы, пытанне аб звальненні В.М. Вайды і У.М. Бадзеева было разгледжанае пасля іх хваробы.

В.М. Вайда звольнены 22 красавіка, У.М. Бадзееў 29 красавіка за з’яўленне на рабоце ў стане алкагольнага ап’янення (пункт 7 артыкула 42 Працоўнага Кодэкса Рэспублікі Беларусь).
Часовае выкананне абавязкаў начальніка аддзела па фізічнай культуры, спорце і турызме ўскладзена на Л.I. Казлова, дырэктара цэнтра фізкультурна-аздараўленчай работы “Сатурн”, начальніка аддзела адукацыі – на Л.С. Петрыкевіч, намесніка начальніка аддзела адукацыі”.

Галоўны інжынер Вілейскага лясгаса Міхаіл Басацкі, які атрымаў у аварыі траўмы нагі, працягвае лячэнне ў бальніцы ў Барысаве. На выхадныя яго адпускалі дамоў, ён прыязджаў у Вілейку. Пра гэта расказала “РГ” намеснік начальніка лясгаса Таццяна Анішчык. Паводле яе слоў, удары нагі загойваюцца, але марудна. Міхаіл Басацкі ходзіць на мыліцах. Дактары пакуль не бяруцца сказаць, колькі патрэбна часу для канчатковага выздараўлення.

Ад выздараўлення залежыць магчымасць узбуджэння крымінальнай справы па факце дарожна-транспартнага здарэння. Намеснік начальніка райаддзела міліцыі Андрэй Дударчык сказаў у інтэрв’ю нашаму выданню, што вызначыць ступень цяжкасці траўмы можна толькі пасля выздараўлення. Вынікі экспертызы будуць залежаць ад таго, колькі пацярпелы знаходзіўся ў бальніцы і якія працэдуры яму былі прызначаныя.

Сяргей Зянько