Колькасць забойстваў і замахаў на забойства ў нашым рэгіёне ў 2007 годзе склала 4,9 працэнта ад агульнай па краіне. Колькасць жыхароў у рэгіёне – прыкладна 4 працэнты ад агульнай колькасці жыхароў Беларусі. На 100 тысяч насельніцтва краіны летась прыходзілася прыкладна 8 забойстваў. У нашым рэгіёне – амаль 9.

АШМЯНЫ

У нашым рэгіёне ніводнага забойства летась не было толькі ў Ашмянскім раёне. Старшы памочнік пракурора раёна Андрэй Клышэвіч паведаміў у інтэрв’ю ”РГ”, што справы па забойствах і замахах на забойствы ў 2007 годзе не ўзбуджаліся.

МАЛАДЗЕЧНА

Па колькасці насельніцтва Маладзечанскі раён самы буйны ў рэгіёне. Адпаведна, і забіваюць тут больш. Старшы следчы пракуратуры раёна Вадзім Шукрынаў сказаў у інтэрв’ю ”РГ”, што, бадай, самым рэзанансным было забойства маладога мужчыны ля рэстарана ”Стары замак” 21 красавіка. Двое мужчын 1980 і 1983 гадоў нараджэння рукамі і нагамі жорстка збілі сваю ахвяру. Пацярпелы памёр у рэанімацыі.

СМАРГОНЬ

Пяць забойстваў і два замахі на забойства было ў 2007 годзе. Адзначым забойства ў вёсцы Монтацішкі. Следчы раённай пракуратуры Сяргей Боландзь расказаў ”РГ”, што 3 кастрычніка 50-гадовы мужчына ў доме №5 у Монтацішках пасля распіцця спіртнога нанёс сваёй 63-гадовай сужытніцы не менш за 14 удараў нажом. Жанчына памерла. Пасля гэтага забойца спаліў дом, пакінуўшы ў ім памерлую.

ВIЛЕЙКА

У Вілейскім раёне ў 2007 годзе было чатыры забойствы і адзін замах. Пра гэта ”РГ” расказаў следчы пракуратуры Аляксандр Чараповіч. У ноч на 15 ліпеня 16-гадовы хлопец у вёсцы Кузьмічы залез у дом 76-гадовай бабулі. Па галаве і тулаве рукамі і нагамі п’яны зламыснік нанёс гаспадыні больш за дзесяць удараў, пасля гэтага задушыў сваю ахвяру.

ВАЛОЖЫН

Да дзесяці гадоў зняволення ў калоніі ва ўмовах узмоцненага рэжыму прыгавораны мужчына, які 17 красавіка 2007 года ў двары свайго дома ў вёсцы Кудзеўцы да смерці збіў сваю 80-гадовую жонку. Як паведаміў ”РГ” следчы пракуратуры Аляксей Бяляцкі, усяго ў горадзе і раёне летась было чатыры забойствы і адзін замах на забойства.

МЯДЗЕЛ

Малатком па галаве ўдарыў не менш за дзевяць разоў свайму знаёмаму 46-гадовы нецвярозы мужчына ў доме №28 вёскі Падбярэззе 2 сакавіка 2007 года. Пацярпелы памёр на месцы. Па інфармацыі пракурора Мядзельскага раёна Валянціна Чаеўскага, гэта было адзінае забойства ў Мядзельскім раёне ў 2007 годзе.

АСТРАВЕЦ

Дваццаць адзін год пазбаўлення волі – прыгавор суда раней судзімаму за забойства 59-гадоваму мужчыну, які 22 мая 2007 года падчас распіцця спіртнога ў доме №48 вёскі Гіры ўдарыў нажом у грудзі свайго знаёмага. Гэта адно з трох забойстваў, здзейсненых летась у Астравецкім раёне, паведаміла ў інтэрв’ю ”РГ” следчы пракуратуры раёна Алеся Пацына.