Начальнік аддзела фізкультуры, спорту і турызму Віталь Вайда вызвалены ад сваіх абавязкаў, начальнік аддзела адукацыі Уладзімір Бадзееў яшчэ не звольнены і знаходзіцца на бальнічным. Крымінальная справа па дарожна-транспартным здарэнні, што адбылося 7 красавіка на вязынскай дарозе, пакуль не ўзбуджалася.

Выканальнікам абавязкаў начальніка аддзела спорту прызначаны дырэктар Цэнтра спартыўна-аздараўленчай работы “Сатурн” Леанід Казлоў. У інтэрв’ю “РГ” 24 красавіка ён паведаміў, што былы начальнік Віталь Вайда ўжо вызвалены ад сваіх абавязкаў, забраў працоўную кніжку і перадае справы выканальніку абавязкаў. З якой фармулёўкай звольнены Віталь Вайда і чым ён будзе займацца надалей, Леанід Казлоў не ведае.

Намеснік начальніка аддзела адукацыі Ларыса Петрыкевіч у інтэрв’ю нашаму выданню сказала, што Уладзімір Бадзееў па-ранейшаму знаходзіцца на сваёй пасадзе. Пакуль ён на бальнічным. Аддзел адукацыі працуе, кіруюць ім два намеснікі, адзначыла Ларыса Петрыкевіч.

Крымінальная справа па факце дарожна-транспартнага здарэння, у якім 7 красавіка сутыкнуліся службовыя “Волгі” аддзела адукацыі і лясгаса, пакуль не ўзбуджалася. Чуткі пра ўзбуджэнне справы абверг начальнік аддзела папярэдняга расследавання райаддзела міліцыі Аляксандр Каратыш. У размове з карэспандэнтам “РГ” ён сказаў, што цяпер па здарэнні вядзецца праверка. Згодна з Крымінальна-працэсуальным кодэксам, яна можа праводзіцца да трох месяцаў, па выніках праверкі будзе бачна, ці ёсць падставы для ўзбуджэння справы.

“Да заканчэння праверкі ніякіх каментарыяў быць не можа”, – сказаў Аляксандр Каратыш.

Калі гэты матэрыял здаваўся ў друк, у першай палове дня 24 красавіка, у Вілейскім райвыканкаме праходзіла пасяджэнне. Яно пачалося ў 10 гадзін. Пытанні, якія разглядаюцца – вынікі сацыяльна-эканамічнага развіцця раёна за першы квартал 2008 года, вынікі ацяпляльнага сезона і падрыхтоўка да наступнай зімы, рознае. Ці разглядаліся ў раздзеле “рознае” кадравыя пытанні па аддзеле спорту і аддзеле адукацыі, чытайце ў наступным нумары газеты.

Сяргей Зянько